Azul,

Mk lli agh smunent kera n tmsawalin gh ubaraz n imdyazn n umadhal nkki d ssi abdesslam nassef,ssi brahim oubella,ha tnt id :

ABDESSLAM NASSEF

Abaraz nimdyazn af jm3ax ditun

iggut ma a dur irin afra gratnx

askkin n’uRmmuy ran assis gnnux

awaL n’ umazigh nfL win darnx

kada n’ umdyaz timzgid axd nkrn

Lif as ittara ighR tibratin

yiri gis kra ad RZn tadwatin

RZnkm a taLLuht RZn LqLm gawrn

BRAHIM OUBELLA

a tabrat  nghwitt  nghratt nssdus as
walayni  tayyad as ra tndd  faslx

rbba  imazighn gat yan  i tghimit
awal yan ad ig ur tad ig smmus
timight ad n gr tagwmatt ur gisnt
i  yayran a ggis imdi acbar ns
amr lmut , ibrrayn urrad  kmmln
wanna ira  yara tadjjmt ard aran
lhrf  n umaguz ur gin abla yan
ur ig wiw3rab abla win hakkak
ur ig win uruppa bla win hakkak
kullu iskkiln gan yan a gwma tnx
mndun tifinagh ig  tnt nzra ssnx
is ng amazigh is nufa ddmnt nx
ajjayt amazigh a ighr tabrat ns
tajjim tilili ays nt ng tisnt
mun at f  usatur a ng afus g ufus
a acbar ira ginx ad asd nmun
a nut walli yax ishacan ghur nx
igh nbda hann irayx ighwi gh tillas
igax tawryut nsn ndrd s akal
asif ig imun urt akw izgr yan
ig ibda wannat ilkmn izri nit

Babas n masin

TAIEB AMGROUD

azul aytma manza nn rzmat agh

i ghadd nnaw nnaw munat gat agh

yan a nmun tamunt n ughu d waman

kigan d uzawar ilkm d ar darngh

matta ghikad nga nzi ka gratngh

ur nmmagh f yat urta agh injm yat

ghar imutr yan ngh yan ihdo t inn

ghar ad ka imlaml sku t id ghawln

mddn s wawal lmmusn ur nzzgi yat

ibiks utggar ngh ar ittbnghal

ozo ns ar sswan igran ns d umur

lli f hbbrn irin d ad agh d iroh

ajjat ghann lli f nttzi taddjim agh

a namz ifassn tagmatt a nga ssngh

is iggut ugharas kigan d utrs

ad agh d iqqann mmaghat ad tgm yan

wanna iran a yara yara ibalak

askkil nna d isti taddjim agh

ig iyt aromi d wa3rab ur darngh

ittaf atig n wwa iluln gh darngh

tifinagh ukan a igan udm nnagh

imma "larami" zzan d ula dd latin

mach ad d dagh urrigh nsgiddi idrfan

babas n masin nkk hayyagh ditun

yili ma innan ur d imikk gin as

mit d ughman agayyu ns ayann gan as

ku tikhsi ar tt ittagwl yasi udâr ns

tamazight da gh ismunn tga yat

anzgumm lli agh izdan ad gn yan

iga t win tmazirt a tagmatt ngh

iga t win imazighn a mad sawlgh

iga t win tmazight a zund nkkin

a bab n imurig amdyaz gat agh

afus gh ufus nmun yan ittzallan

izzall yan ittazomn azom ha k inn

ku yan issn mani ira ma f d ilul

mani gh d ilul is isuggwa zran inn

ghayelli nzra yuf yan ad gwmmin

ar aqqran ssnn issfld i ddmin ngh

ghrn amzruy akwzn tizrawin

willi d immuddan aghni ad tn d yiwin

d imndi d ddmnt ngh d tirbatin

wanna ur issn a yaqra yakwz ifrk

imma iwaliwn gan yan igh d ilul

warraw gh inna gh ilul lmdn awal

d tussna ns sis iddr ar d iggwz akal

ur illi man awal yugwrn wayyad

is ur gin imuslmn mlyar d imikk

gin wa3rabn kkoz mmaghn jdrn agh

ghikann ka bdda gan ur jju thennan

awal nnsn ur akkw ijnjm nttan

agayyu ns niri ad sis nzzgu awal

ajjat agh ukan gat yan ng gh ul ngh

tayri n tmazight nkrz grgh nn

awal n yugrtn tihyya d massin

BRAHIM OUBELLA

ahh int a ymmi afran ibri yax
rmin idudan izri da sghuyyun
ur nmyar a talluht akwnt ghawlx
igh ur dari gh ufus mas ntghawal
adrf wannatn yumzn hann hakkak
ad ig ad isnm ardad ard lkmn
ghikann d urar a yan mi llan gh ul ns
iqqand ad ittuzan tirra d wawal
hann ur ka irxi yan ad ig mamnk
immuyd ak  a yan ihsan id lif ns
yarad wiyy ihrc  awr idr  gh wasif....

Azul ,

Mk lli s yad nnigh,smunen iyi d mennaw imdyazn kra n imsawaln,yan gisn,mas brahim oubella,lli mu ssuturgh ad iyi isurf igh d fsergh mayad,awettas inu iga t ad yali watig n tmdyazt ;ad zrn imddukkal,d aytmatn ngh,istman ngh,anaw n umarg d tmdyazt lli llanin gh ugadaz…

ha mad akkw nenna ,berrkat,tighri yatfutn

Taieb amgroud :

ayyuz nk a ssi brahim ar ttazzalt

ar d tlkkm tbdrt nk ghilli gh ngiwer

illa giwn ssi3r nnagh win tmazirt

win ayt ghid ayt tmazgha d imazighn

mra gan mddn zud nk iku gaddant

agh akkw tghawsiwin da f ttazzalt

ifukka ad nnkr nduy nfrk igh nbiks

nmun ng afus gh ufus a nkkrz nqqn

uggug ngh imun gis ufrak ad igutn

ingi f tmazirt ar isswa u tmazirt

BRAHIM OUBELLA :

ayyuz nk a tagwmatt nzra nit aga nk
yugm d gh waman da righ lahhi fad inw
tabrat llid imlafan tiwid lbrkt
hann tufiti d a gwma tnx ark siggilx
ssi 3li yiwik a jmil acku snmaggarn
id bab n tnddamt iwin kwnt a lmziyt
brrk awddi brrk a yan yuzzln ighawl
adrar n bani rzmn ak nit lbab nns
a tzrt (aza) llid fln id bab n tazayt
willi dar illa usafar d uzrg idusn
ar kinn snimmirx a tagwmatt lligh anx
ikwti wul nk imlid aslal lli gisn........

s tmmuzgha

BRAHIM OUBELLA

Taieb amgroud :

ayyuz i yan izwarn gn aslmad ngh

ayyuz i willi nkrnin zikk ttazzaln

biksn y tghnsa d tmazight ar swngimn

frêdên akal a krzn amud win tmazight

ssun t ulawn d ixfawn s tidi d idammn

ccin fllas willi zrinin takat iggutn

zud nkki lli d ittgurun nufa d taddagt

tgrrf ar rêzzêmn igwdlan yuf igh nbiks

n^dfêr tawwuri n zud nk wakha ttigutn

ibayyettaren d tfikit rassul rêzêmnt

tflwin i tifawt d tidt a nssfld nssn

nêzêr akal ad s ghiklli iga ,u tmazirt

ad nn yaggw gh tissit ighusn ad issaggw issn

ma iga , ad ur ighawl ad nn izdi d  tmyaggugt

ar allan i yan yaggugn akwin u dares

brrk aweddi a ssi brahim gh iffus îzîln

igh k id iwin igharasn nqqr d taggurt

n iwik  taieb gh bujdur illa gisn

asif y uslmd igli d siti ungi ns

yawi yi d ad nn helli nêzêr tamazirt

imma darngh iqql sigh d ayt tmazirt

ayt imurig d uhwach ihahan nga tn

BRAHIM OUBELLA :

nghwy ajddig nnk iga lwrd n tmgunt
nkwdat ati gis tujjut n ayt tazayt
anya nssld asn uslnd amzzugh inw
buyzuran agh axd inna kra : "ssflid ayt
hann darun a ssi Brahim as ttizzilx"
ghikann af nkkis taggurt i wul ad inw
ad srs awix id lif nns d unqqid nns
nini hayyax ay-Mrghud tumrt iggutn
as rakk nmiggirx igh nkcm d umuddu nx
hann tanzruft i imuhagh asa siggilx
aggis armx i idrfan tagwrsa dusn
amlal ns ur ntnasa lxir ns iziln
ntta gh ittaf iuznatiy lbarud nsn
azmz lli gh ax tumamt a tamazirt
3aqd a Ttayyib a tghwit rrsas mmaghayt
acku ajjag n tmagit ar ssndamn
a3rab ighwi tanbadin yusi tuzzalt
ar sis iqqrs ur cuwwrn ura ttmhaln
igh ur nduy nfk lxatr a naf aga nx
ur rad ax ifil fad nm a tagrzawt....

B.O

Taieb amgroud :

tlkm iyi d tarragt- n ssi brahim - izîln

tabratt tlkm tanmmirt nk ayyuz nk

ssi3r illla gitun irird ns nssuggwa tn

anza nnun lkmn darngh sul nkk mzzîyegh

lligh d mqquragh ghiklli nfrk ad siggilgh

s id bu ufrak awr imil nmun nbiks

naws i willi agh ittzwwurn a nkkrz nks

nzzutf tid imdêl wacc ad di ttaggwant

tzrawin abaynu nnagh ukkus azaln

ad nn grawlgh zêrgh idêgam nsaggwitn

nssn agayyu nu akwzagh ikhf inu yuda ngh

gh tullghitin n yan d izzan yakwr yazu ccn

ayda nnagh akal walan t awal mdêln t

lligh d nduy nfaggd nmmagh f ayt tmazirt

ar addrgh imal mlgh idêgam ngh rzêmgh t

i willi mu nn intl lla inwwachen ggutn

kuyan d mas agh d nnan ad t zzêmzîyen

gh izêrî d ul inu ad t ur ndêfêr ghassad nssn

ma iran d ma yugwin a yzêr tamazirt

tfulki tfsa tnkr tlkm ayt tmazirt

ad dagh ng ikhfawn ngh tarwa n tmazight.

irwas ukan is d iqqan ayt tmazirt

tarwa n tmazight  ifrkn ibiddn duyn

ad d ssnkrn willi ttâsênin iggwuz ittês

willi immaghen d lâz urta rayid duln

achku ahbbod ikhwan ura ittajj ikhf

da usin ad sul ittkhemmim ar swngimn

"aydi nk rad k dêfêrn ayenna kkan ihiyyf "

willi ccanin aychettan ad iswngimn

yagh tn d s yimal ad t inn zêrên ssaggwn tn

smaghen iyi d zund nkki d lâz nchga disn

qqnn iyi igenna d wakal mutrn i dofn

unchod  ntta d izêri inu igh immuss saggwmn t

mani nn ittmnad msln t igh ibidd ikhf

illf i iswngimn nmmagh d ohbbod inw

ng zud mddn - kkid tasukwt - ar ttazzaln

dêrên gh uggrn ntta d waman ura jju duyn

dofgh ismgan n uhlig ighbula frgn tn

mra is helli zdign talla nugm tn

mach irîz kkisn aman nskr agiwn

nksod  ad agwmgh tiddâ ad tnt nsu bbint

adis n yan iswan ur sar iri ad dusn

ass nna nlkm f tiddi rwln ifaddn ngh

kturgh ahbbod ikhf ittu yi iswngimn

Taieb amgroud :

manik iga ssi brahim azul ad t nnigh dagh

asif ad iga aqbur ur sssngh is illa gh dar

ayt iffus nnigh tata armt iz i yumarg nk

taguri igh tt tsgaddat izgu wawal izzri t

usqqul ad rad k sqsagh ini mnnaw ad gan

isaffn n umarg amazigh ar nttannay zêrgh

mncht n yan ur akkw tn ssnn iqqan d yan ilhan

a yttara amarg ngha t ttinin ad tn fhmn

mach ad agh igan tagat isaffn haqqa jlan

yuf igh nmun nsmun tn nmltn mak idêhêrêrn ?

BRAHIM OUBELLA :

Arbba a gwma tayib anfat ukan i rrih
imma ba3da yusid lhsift s akal nx
agwns n tgwmma agh anx issmra aman
imik iymurig ad nx assul ax ittln
assis nswnnas l3aql inu s imikkuk
awalayni tzza gis titt ur ittrtun
iga zund addag ighas masan icuqqar
yini ahh micca bab ns urasn sllan
illa ma iran alig ns yili ma yuhln
adas ikks aqqa lli gis ula takawin
yili mad fllas igguln arttn issakuf
ad bbin azur lli dars ifit i takat
igh ur nzdar add nduy nasi aqryan
assis nsmuss izig nsmuss d ttafatin
ati timdlt ns adak rant tamarin..........

B.O
tanmmirt nk

Taieb amgroud :

hann a ssi brahim ado kchemn agh i3rchan

agwns uwhanu agh iberrek ar agh isukkut

tid ifulkin d tid ichwan lli nmyar

ikka d lqblt d tagut ar ukan ittây

imazighen ayt tmazirt lli tt inn ikkan

gan id bab n ghid ftan akkw ad tn lah

izzugw agh lâz d fad nkhwa ghilli gh nsul

nili gh uchbar f wiyda ngh nnigh ukkus ngh

ndof akkw ghayelli d akkw nufa ar ittafod

mddn biksn i tmazight ad tnt inn mdêln

imikk ad n imurig a yghaman urmn as

kigan  n ugêdî ad as nbbrn a yemmt att ilih

imma timyurin ddant ula awal nnagh

zud nkki d kyyi kad disn immaghn s imikk

ad ddrn gh ussan ad mncht n yan ad t ifln

idus ufna n tmazight aqryan iggut

n willi agh d ikkatn gan yan ssutln agh

mach nkkwni urta jju nra ad d nduy nkrgh

ahh ayamarg kigan assitun iqqln

igh ur nsssfrk wwidakwn isalan nmun

hann ass nk yâz d ghada smuqqulagh iggut

taieb amgroud

BRAHIM OUBELLA :

... inid uckix ad addrx mayyin ixassan
rad inix wakwak add nsmun lxalayiq
imazighn ad ur igin yat ur nmalan
irayyi udar nx izzar niri tasawnt
urd a3rab af nhuwl ula ssihln ax....

Taieb amgroud :

hann a ssi brahim iggut wawal mklli s

tnnit ayg lhal iggut mayann ikhassan

mach iqqan d a nswngim imma taghwyit

ur jju fsint tid ittyasasn ghar is

isa bahra ttnkhabbaln ifalan nkrs

"imttawen ar zzmziyen awr yalla yan

isaka ttzeyyadn ddellt i wanna yallan"

yak archach ad t id iflan lli t innan

ur mmutn mach tamadont anit ittarmn

wanna tghwi tghrid i "lmalak" ad t awin

ha lmhfod idêr iggammi matt isalan

idda jam3 lhamidi flan lmakan ns

aysar da ddâlâbn ghasselli gh ittâf

idus igh ar ismdudiy ghilli gh ittirir

imazighn iga ghad agh ngh ikkatn kigan

tammara d laz d fad d ughruch d t3amit ngh

willi sognin ayagwin a ikhf akk allagh

a nmmagh d uhbbod arkigh nttu nakwi nn

yan igguran ig mkada t ran wwinn attig

amgroud

Abrih   /   إعلان    /   Avis

Rad nn tafm « Agad n tidt » gh idgharn ad / تجدون" أكاد ن تيدت" في الأماكن الآتية /vous trouverez « agad n tidt » aux endroits suivants :

   

Tinidlisn / مكتبة / librairie : Almoggar – la ville nouvelle – Agadir

Tinidlisn / مكتبة / librairie : Alyaakoubi Med - place des bus  – Agadir

Tinidlisn / مكتبة / librairie / papeterie AATAFAY –rue de Fes – Agadir

Tinidlisn / مكتبة / librairie / papeterie: Almoustakbal – rue Marrakech – Agadir

Tinidlisn / مكتبة / librairie : Baderessalam – Agadir

Tinidlisn / مكتبة / librairie : Ibn khaldoun –hayy dakhla – Agadir

Tinidlisn / مكتبة / librairie / papeterie Alazhar aljadida – hayy dakhla – Agadir

Tinidlisn / مكتبة / librairie / papeterie L’ATLAS – hayy dakhla –Agadir

Tinidlisn / مكتبة / librairie : Chiraa - Inezgan

Tinidlisn / مكتبة / librairie : Alquds – Inezgan

Tinidlisn / مكتبة / librairie : Chiraa - Inezgan

Tinidlisn / مكتبة / librairie : Chahrazad - Inezgan

azul

ayyur n mars ad izrin,d umzwaru n abril,ismun iyi d umddakkl ,amdyaz ngh ,abdesslam nassef,d mas brahim oubella,aslmad ngh,d yan gh imeghnasn ixatarn n tmazgha,d mas farid mouhemmad zelhod,iwis n tfraout,d mouhemmed wagrar d wiyyadh.

rad awn d fessergh imsawaln ad imikk s imikk,surfn iyi imddukkal inu gh omdyazn n umadhal"poetas d'elmundo" igh d fsergh isiwngimn ad,righ ad tn ghrin imazighen,willi ttirinin taguri immimn

tighri yatfuthen

Taieb Amgroud

ifis wiss kkoz nqqrgh situn

azul fllak rzêm tiflut nk

i yan umdyaz annarm awal

ini brrk lâz ayinn yiwin

ur igi aghrum as siggilagh tammnt

tin umdyaz igha isawal

ar isgiddiy idêrfân chowwern

awal ur igaddan ar t iffal

siggln taguri dusn stin as

mani rad tggiz igh nn tut ul

n yan issflidn ghrn sllan

ara amarg rad dik nmsawal

Abdesslam Nassef

AMrhba Taib nfrh situn

tufid waLLi rad ak isw LmLf

iDéD kuLLu mad iTTaf srsnt

anaw nk as nsiggiL isk ufix

awi gis ghmk uLa ghmk awr tahLt

tammnt anZZaD iLLa usafar .

innan TuDnt ndawak s´imik .

yan anx iran nga wins nrat .

urak gix TM3 uLa nsaLt .

Lmuhibt nfRRbi ad iLan tisnt .

imma tin LghRD isa tkmmaL .

Taieb Amgroud

ayyuz i umdyaz isrsn afus

f lqrs ghin zznad nqqrgh situn

trzmt nit lbab afulki ssngh

is a ttlalan uzzun nk a souss

nasef ha amdyaz uru ihahan

inna ak brrk gid afus tarmt

awal d umgrud mqqar kwn ssngh

tgit aqbur nzza d annarm imikk

n wawal d middn lli asn issn

illa gh tama nou ddrst iysuqqas

ghrgh idêrîsen da gis ism nnun

annigh tn gh jjnb n wingh ammas

n umadhal n imdyazn lli nn tlkmt

awa brrk kf adâr i ugharas

igh tzrit agadir lkmagh nn

tammnt d udi d tujjut ak hiyyelgh

illa wargan nqql ad ur tmâtêlt

Abdesslam Nassef

Adanx ig RBBI ghiLLi ax yuman

Adur ntkabar adur nttattuy

8an ibLis ira gitnx takat

addids nCrk ida LLin waLan

NaDuD iLmma adakn kmmLx

Ak isrbh RBBi tuddit LahQuQ nxi

ghmkad ayga yan igan ixt nTTaf

mQQar taggugm 8an isk nmis

uLawn ix MRDan is kafan

rad ntmuddu sL3aQL ark Lkkmx

ufix gitun L3in i rafan

ur nhtajja s´izakarn aman

iggi n´wakaL ngin ak simim

ghassad ka nufa ad nssa swuraw

L3in nk a Taib iwin tammnt

Taieb amgroud

tammnt yugm tt id isslkm itt id

ayelli d ttazent nghwi tnt

a tizzwa ajddig afa ttmunent

kuyat mani mu d nettat humnt

tawi d kigan mmaggarnt srsnt

kturnt amchâd igh iktur ad t

yarm yan ittadênn ul yarmt

wanna isiggiln gis ad ka chin

awal ajeddig as ak t mettelgh

ad uten imdyazen sachkn t id

zud tizzwa ayad nga ar nsêku awal

ass nna iga amchâd ira t kuyan

amdyaz walli t igan ur t ukan

ihul ayttkabar achkou ssnn

ikhf ns issugga t ur t ntln

hati lkibr wwad ur ittfn yat

ur igi adrim ul idusn ayek nnigh

d ikhf igh swngimn igh isfa yan

urakkwa rad ikabr f yan t issn

Abdesslam Nassef

A tizwa ajddig afa tmunt

L8mm uMaDun aggisnt yaLLan

ar ittawuz iggammi asafar

IDBéBn ghassad ranayk LmaL

yan mi iffgh afus rgLn´n fLLas

LghRD ayg uzmzad urak hnnin

wannaxn iLLa midn rant immim

asnna xkid iffagh iLuh situn

ghan af iCwa ghmkad ix an sawaL

anniny ayLLi gitnx sLLan

wiLLi rgLnin mad ran Lmsakin

usind aSWWaD ran anx nqqan

LLix nSBR bzziz iLix ka aTTan

umnx sRBBi ddu3a LLix situn

tanna nra tLLa darun trxak

imma bnadn rad ittas fLLax

radak imL aFRZéZ innak tammnt

ur nsmammi ghad ufix n´nnat

8an iska n´nna ad nmhukw awaL

Taieb amgroud

awal walli t igrrun chowwern

wanna isemmgwra gn t i tghmrin

wanna zran isgiddi t imsl sis

ghinna ddas igadda rad tn qqnn

awal n umdyaz afa nsawal

imma wanna tn helli irwwin

igh ijma3 d middn chrkn awal

mani gh yufa zud wwa nsawal

ighiyyez ifrn ig aqqayn immim

igh ifta yurri d afufn ighus

wanna as isflidn rad t irin

anaw n imdyazn ka f sawlgh

zud nkki d kyyi biddatagh munat

ng yawfus nmmâzî nmyawas

nall nsdus agadir nsêku t inn

i wawal amazigh igh t annin

willi rad agh iggar angh rêhêmn

Abdesslam Nassef

8an is ka n´nna addiwn mhukkux

RZmx nit LbaB an atn armx

imma awaL numdyaz is iL tisnt

ixt iguna isgiddit iSSRSut

RZmx yan Lbab ixawn immim

Lbab nuzmzad mannak tufit

mamnk situn ig LhaL mamnk

yak urd aSMMéD yak ur tnwit .

yak urd aZawag yak ur tntLt

yak urd ijiwwi ad ikkitn init

mani xtLLit ad issanx init

nkki 8an aSMMéD ax issutLn

gigan dudfL ad annix yussax

tafukt ad nSRja Lahhitnt

haqqan kiyyi TRghit is TRhmt

Yan ifLn iLLi gh iLuL mamnk

mamnk ra yyiLi dL xaTR ifrh

8akkak ubzziz a fatn iffaL

gan Larzaq xkad urak caTRx

aynna ira RBBi ad iLLan sLLmx

Taieb Amgroud

wa brrk aweddi darngh nasef

trzemt d yan lbab lqqmgh wiss sin

taggurt a trzm sduqqrgh situn

tnnit brrk rad ditun chrkagh

awal d imurig ad tn nsrwat

nghiyyez as izidh afufn imun

wanna asn issflidn ghrnt immim

hati ssfldagh iga ya imalass

smizegh awal add iroh wawal

nk a gma gh sswid agh nn tellit

lligh urta tmmuddit igh 3aqlgh

f mamou nssfld tighri ad tsalat

mach larzaq mmuddan ak tawnt

i europa sswed agh nn tufit

lkhater ttuktabn ghinn waman

yili iyt osemmid ngh irgha wass

iqqan d i yan ad iserref ussan

da d dis yiwi zud nekkin salagh

tawuri nk lli izwurn agh nn

ntab3a almmud i tarwa nnagh

a ygan tawuri da ghid salagh

gigh ihihi baba suln ukan

d immi gh darngh ghid ttafegh arraw

a boujdour agh nedder lli iwalan

iffous n lmghrib lli f nemmagh

lmnzl ad n ghid ar ittmrway

igh ill osemmid sigh irgh lhal

amlal yasi t ijiwi s wuraw

iffagh t id gh tozzomt i i3rchan

darngh willi t id ikkan sellagh

asen bdern imndi qqurn issus

ifer mani gh radd dagh afen alim

ahh ayayet tmizar ann kemmeln

idhi tn lâz d fad rwln ku yan

d mani s t iwin idârren ns ittu akkw

mani ira mani d ikka aghrum att

ittayen ayeg zud nekki d keyyin

Abdesslam Nassef

A8an a Taib nfrh situn

zud anZaR i TaghaRT ask mttLx

irafan dagigi ganasn aman

8an ajmiL isiga wink nssnt

ak nsaqsa ghinna darun mamnk

mamnka tgit a tagant is TRwit

manzan akssab isar kssan

is iLL Laman ad isnfw iTTas

yak uCn ur iZagh atnt saLan

ya uZkay ur ighwi  afus n´uCCan

drun tirmt ign yant ifLn

raraxd Lwijab nfrh situn

Ttaieb Amgroud

nasef hann idodan ngh n ufus

yan isda wayyad isur fellas

manwad ra nbbi adagh ur khissin

ghikann d imdyazn chrkn awal

wanna gh illa fad nqqrn s wwann

wanna ingha lâz ncherk tirmt

ul ikturn s ibrrayn nkkis

anzgum lli gis ittchalan

igh awr issflid yan ngh i yan

ig as afus iggr nn i ul immass

yut ikhf issngi awal 3aqqan

nnan willi agh ugrnin chatrn

"a yawfus urrad akkw utn allun

ula idikl lluz ur ar t irrag

ur rad ak ikrz ura isrwat"

mani s tnnit ad gis nn satagh

taggurt lli d trêzêmt ar tmqqur

amksa d uccn gan tikhfawin

gh ommâz mra d tuggit ad tannit

tagwzdit tlloz uccn msasan

nttan d umksa gan akkw si yan

Ttaieb Amgroud

azul hayyi dagh nghra yak

mani s k iwin idharren tfelt agh

a kaygatt ass aggwagh nn situn

mah ljawab nk ur t annigh

yak a gma henna hnnan wussan

yak ur d igguri darun mann ur tamagh

yak ur d attan ad ikrfn afus ?

yak ur d asemmid akk ismateln ?

nsaqsa gik f rebbi lligh kwn lah

« Agad n tidt »
Asmmaqql izwarn

Issufgh d umdyaz ngh tayib amgrud gh usggwas n 2008 tawckint ns tamzwarut n tmdyazin,macc wanna tt ighran yakwz tiguriwin ns d wasa n wammak ns rad issn is tga tamzwarut ghas gh mnid n tzragt; ad tga d izêmi n tarmiwin n mnnaw isggwasn, aslal d iffughn gh kigan n tmmara d urfufn; amgrud ur igi amdyaz aylligh issanun tiguriwin d twinas, ifrn tutlayt, issukf iwwutta n unlli fad ad innurzêm i twwurga ns ad ttfayrarnt gh ignwan d imadâln ur smdnin, inna fllas mohamed Oussous lli yuran tazwart n tawckint mas « iga amkkasu n sidqi 3li azayku macc ur igi amalu ns», mayad nzdâr ad–t inn nakwz gh tawckint slawant akw gh mad izêlin s twila d ttimat ns :

Tawila :
tawckint n umgrud llant gis sdîmraw (60) n tasniwin ittiwbdâ fllasnt mad ittggan kramraw d yat (31) n tmdyazt d yat tzwart, tarragt d usnimmr. asmmaqql amzwaru ar immal mas-d amdyaz ngh irks gh tawckint ad ngr mnnawt tgharasin d wanawn n tmdyazt, tazaykut d tmaynut zund igh ira ad yini «tamdyazt ad tili ngh ur tlli» isqqwal d isaffn ur gin amr imassn; igh tn akw ilmd irmstn, ur ad ig amzdyaz igh zwar ur yufi aghbalu n umarg isu-d gis yat tissi igan tin usnflul mayad ad iwatts umgrud lli gh inna : tatrara tqqan d mac ad ur nzî d uqbur.
Uggar n mkann ar nttafa gh tmdyazt n « asqqul » tighawsiwin zêlinin s ufran acku ar agh yakka taswingmt ns d umnad ns i tirsal lli s d iqqan ad fllasnt tsur tmdyazt idusn » :

Taguri igh tt tsgaddat, izgu wawal izzri tt
Usqqul nna d tslit, tzêlit ilmma adghar
Kaygatt awal siggl as illi da gaddan irgl t

Maya d ad isiggil gh tmdyazt mac tugtt n idêrisn ur ttâfn tiwtlin ad:

Idêrisn gisn ittyaran ass ad ar ittidrus
Mad ittqann d wawal d tguri ar tnt izzgaw
Ar ismkilil, yawz tanna as ifrghn tdêr

Mayad ar t ittini umdyaz acku ar izrrâ tirra gant tamasayt tamqqrant; nttnti as ira ad isku agadir n tussna Tamazight; mayann af d iqqan ad ig wwad idusn; ad izzîdr I ijawan n uzmz d taksniwin n tudrt:

Wanna ighzan i ugadir ns, icuwr as, isdus
As tighawsiwin ur as issugwr wadû ad ti rdln

Ismd ar issutur gh wanna izuzdên ad ittara tamdyazt :

Yan rad ittara, yini tamdyazt yuf ad ghrn
Zzrin isaffn ns, irms isqqal n umarg ngh

Mayad af immagh umgrud gh tadla yad ns att idfur, ar izmmzêlay gr tguriwin, ar isiggil s tad immimn ilgwaghn ittwattasn ul n imghri, tsnfassi tasa ns, taguri izddign ighwzânn, ar nttghal is nennurzêm kra n umawal aqbur, ngh kra n wawssar n zik ad-t yuran, mac mklli s dusnt tguriwin ns as fawnt, ar mmalnt iznzârn n ils amazigh d iwaliwn ns ddrnin lli f isur gh kigan n tmdyazin am agzzum ad lligh inna:

Agayyu gh ignna
Gdên idârrn gh ulûd
Ar nttllm izakarn
Gh imi n ufunas
Ar ngrru tubbicin
Dêrnt tiwllay
Ar nakka I willi ccanin
Jjiwnn
Ad dagh ccin…

Amawal n tawchkint ittut s kigan n tguriwin n umadâl n tzgzut am:
skrn tigwzday d igwlifn, ccn udi d ibawn
Gh igwnan isaffn, drun argan d tkidâ nk
Tanna illan ndrutt; ngwdl-tt gh tagant

Ttimat n tawchkint:
Amawal azgza lli s ttyara tuwckint ar immal mas-d amdyaz innukma gh tudrt d tidt ns irzâgn, ar isiggil ad as irwl, immuddu izug ar d yaf agad lli rad as yaru tidt tamaynut, isku amadâl azgza igan win tayri d tagwmatt:

Ar agh d iktti yikhf, ira iyi yan uzmz
Ghar ad trzêmt taggurt, tannit ajddig
D tibi fsan, idl sis udm n wakal, igrd
Ufulki ngr middn, nkrz I yan rad ikrz…
nmgr, nsrut adwal d tiwizi d iwiz
amarg, azâwan d umiy, awal ila atig
……
Gn akw middn yan s usram, nmun nfjjij

Mac mayad ur igi amr tawwargit, tamdint n aflatûn, add ukan iduy umdyaz ngh, isyyafa atrs as iqqazn gh ul, ikti-d iggammi ad ittu walli as ijdrn ul :
Ar rmmigh ad staygh
Mac ur rad ttugh
Yan ijdrn ul

Wwad as ijdrn ul ur iga ghas yan, ad iga d ungi ibbi aman f igran, aylligh rufan ar isswa win wiyyâd fad ad bughlun:

Max aylligh ar nggin
Ighbula ngh
S igwmmadên ann
Ur swin igran ngh

Igran ad ur gin amr win wawal d tussna Tamazight lli f ikka ungi isngiri t d waman/tarwa s ibadân ns d tkrkas, isttu asn ixfawn nnsn d tmagit nnsn, gin ifghuln jjun ur izdârn ad smaqqln ya tklit gh ikhfawn nsn ,mmagh n izmaz ggutninad ilin wiyyad gh umras nsn ;nghubun ntni , afudn tqqar tussna nsn d tghrma nsn :
issngi irkan
D tujjutîn imi
Gan ulus
I wanlliwn
Lli hêra d inkrn
…
Ssidrn tikrkas
Idrarn n ibadân
Iswingimn n lâz
Tamagit af ittut umdyaz ngh, ar iskar asttâ gh wawal; imcd gh iskkiln fad ad ig anazâr I willi ranin ad qqarnt tguriwin gh idmarn ns, issnfl tutlayt ns s uglulu:
Ittyara flla
Uglulu ils inu iga annur
Takna, afna n imkkasan
Da i izêrran
S izêri aknnad

Tamagit igh tmun d ungi, ras-tt dêfarnt akw tghawsiwin izîln, tayri rad tzug ar-tt isggil umdyaz ar gis issutur, ar as ittini “qim ghuri”, tagwmatt ur-tt sul issn yan, rad nn tili gh tardast n wakal, ilîh asmdêl ns: “a tagwmatt ttumdâl,asmdêl yaggug”, gin middn imudar n tagant ar ictta yan nnsn yan :

Ad agh igan tagat
Ku yan iqqan d ixf ns
Ad ka iktur ahêlig ns
Yan ira lâz, ilkm t

Macc mqqar illa ungi n tkrkas igutnt tillas rad-d yack yan wass yali d itri n tidt, turri-d tayri, gin middn middn:
Yali d itri
Amud n tidt
ilûh izûran
Agad indara

Tamggarut:
tawckint n “agad n tidt” tga tirmit mqqurn n umdyaz tayib amgrud, taguri idusn d wammak idran ad igan tamatart ns. imikk ad idrusn lli fllas ittyaran ur igum fad ad nssisfiw mad akw illan gh wasa ns. ur nwatts amr ad inigh i imghri issn atig n uskkil d tguri d wawal izîln: had yan imcd n tammnt hêrat skrnt tizzwa n umdyaz ngh tayib, mmdiît, ad ak yimim yadêfut.

Mohamed Elferkhssi

Adrar n wawal


adrar n wawal attuyn s wiss sa ignwan
ar nsawal ar tsawalm awal ha awal
gan tiguriwin lluzzant iggi ujarif
zund aqqayen lligh d dhern ad agh ig wawal
illuzza ass nna d iffugh ur rad t izmer yan
udhar3a wawal acnyar yuti ti uburiy
gar awal ur rad jjin mach ijji uberray
awal iga tsemmath igh tn nuzn ayln
ur rad urrin ad t sgiddigh igh akkw d urrin
ur d mklli as skergh as rad agh d urrin

nnan willi agh ugrnin nnan willi zrinin
nnan imdyazn d inccadn isserggign awal
willi ifrunen taguri zzgan adrar ns
yuf wanna bbin ifaghern ngh t icca ubnkal
yan ka addrn mddn mad tn ran gh imi n udwwar

amdyaz

izdgh umdyaz gh tasa nw ur iri ad d iffagh
mnchekk ad dis nemmagh ad ti ttayegh ula jju ggammigh
ad nn giti yitti serdagh as yagwi ad yi d lkkmn
igh righ ad t tugh nttan ikti yi badrn agh
issutl iyi d ifassn d idharrn sul iggall agh
ur sar iyi iffal mlat agh ma rad t id ittay
gh ul n tasa d tasa n wul anlli ad iyi d innan
azn iyi t id ad t zrgh a wr imil iddu sul

igrd unzgum gh wul anlli a gh ar yi d ittar
ir3ay iyi d idammn irks iyi d izuran
ingi d idammn inggin istara d agwns ann
ig agad i umdyaz igrrf rad d ihah

Taieb Amgroud amsitn

Ul inw nkr d aggw nn had ass nk issutl d Imula ghlin igudar ass ad ussrn izrb Ghzzifn iskwla ddan nit lkmn alumaz Mad ittdfarn tin wutch agh ikkusu ghyidh Mad d ittmunen d tillas amdlu d usemmid Mad d ittmunen d tillas aggagn d izillid Mad d ittmunen d iggig tagudhi tikessadh Ul inw nkr ghinn ikhf iduy utn iyi t d Inzgrimitn duygh tamkwtit tmmutti d Makh ura kttigh ayda nezzri ssengh azmz Lli gh sugwrgh idda yak nggura ghassad Azmz da gha sawalgh zrin ndhels ndher d Azmz da gh mzalalgh idda gigh abukadh Azmz da gh nttaf ul ghassad ncca t iggiz Irks iyi dis ughrum idl t ubaddaz

ayyur n yulyuz ad izrin ,ilul gh ugadir ,udlis wiss sin n umdyaz taieb amgroud,isti as d s wassagh "agad n tidt",yucka d gh tis snat tasskfalin dharat n "inagan" llli ukan sul ittqqln gh gr ifassn n usinag agldan n tussna tamzighet zzegh 2006 .

agad n tidt, tadla n tmdyazin,lli s ira bab ns,ad tg tarslt tamzwarut n tidt ,tidt lli agh ijlan,ar tt nsiggil nggammi tt,ku yan d manik s ar tt ittmnid ,mach tidt tga yat

azul dagh

taieb amgroud,amddakkwl nnun ,ar awn ittini berrkat dars,berrkat gh tskslt ad lligh ar d ittaggwa f umadhal,yiri ad t issaggw umadhal,berrkat gh darun,gh usays n uswingm,taguri idusn,awal ilan atig,berrkat dar umdyaz nun taieb amgroud zzegh ghid ar imi n tlit gh ihahan

tanmirt